UN SOGN

U fai vün da quii sogn!...Vuri savell?

U vist a crudá gió dal ciel i stell.
M’è parüü da vess lí in d’un cimiteri.
Poch dunett: chi biassava un Misereri,
chi ‘n Requiem , chi ‘n rusari, inscí sott vus,
fermandus dent par dent arent ai crus,
arent ai tump cun pizz ul so ciarín
che brüsegava dent al lanternin.

Tütt an bòtt, in dal barlüment da lüna,
u vist a crudá gió, a vüna a vüna,
na dunzena da stell che, pian pianín,
in süi tump senza ‘n fiur, senza ‘n ciarín,
a sa pundavan gió, pö stavan lí
cumpágn di lanternitt a sperlüsí.

Nüt e crüt quest l’è l sogn, l’è tal e qual:
cristián tiregan föra la murál.

Giuseppe Arrigoni